Son yenilənmə tarixi: 29/04/2025
Azərbaycanda mobil internet xidmətləri inkişaf etmək istəyən və inkişafa açıq olan ölkələrlə, xüsusilə qiymət baxımından açıq-aşkar şəkildə rəqabətə uduzur. Bunun səbəbləri aydındır, yazının məqsədi bu olmadığı üçün səbəbləri barədə yazmayacam. Polşa haqqımda yazımda bildirmişdim ki, bu ölkədə daha ucuz qiymətə daha keyfiyyətli mobil xidmətlər görmək mümkündür. Təbii ki, hal-hazırda Azərbaycanda yaşadığım üçün 3 operatorun: Azercell, Bakcell və Azerfon (Nar) şirkətlərinin təklif etdiyi internet paketlərini müqayisə etmək və sonda öz fikirlərimi bölüşmək istərdim.
Azərbaycanda mobil internet qiymətləri
Aşağıdakı cədvəldə hər 3 yəni, Azercell, Bakcell və Nar operatorlarının təklif etdiyi mobil internet paketlərini bir araya yığmışam.
| Həcm | İstifadə müddəti | Azercell | Bakcell | Nar |
|---|---|---|---|---|
| 50 MB | 15 gün | – | 1 AZN | – |
| 60 MB | 15 gün | 1 AZN | – | 1 AZN |
| 200 MB | 20 gün | – | – | 2 AZN |
| 500 MB | 30 gün | 3 AZN | 3 AZN | – |
| 600 MB | 30 gün | – | – | 3 AZN |
| 1 GB | 30 gün | 5 AZN | 5 AZN | – |
| 1,5 GB | 30 gün | – | – | 6 AZN |
| 2GB | 30 gün | – | 8 AZN | – |
| 5 GB | 30 gün | 10 AZN | 10 AZN | 10 AZN |
| 7 GB* | 30 gün | – | – | 13 AZN |
| 10 GB | 30 gün | 15 AZN | 15 AZN | – |
| 20 GB* | 30 gün | – | – | 25 AZN |
| 30 GB | 30 gün | 25 AZN | – | – |
| 40 GB* | 30 gün | – | – | 35 |
| 50 GB | 30 gün | 30 AZN | – | – |
* Nar 00:00-07:59 arasında ulduzlu mobil internet paketləri daxilində limitsiz gecə istifadəsini də təklif edir.
Diqqət çəkən məqamlar
Ən çox diqqətimi çəkən məqam hər 3 operatorun aşağı-yuxarı eyni həcmdə olan mobil internet paketini eyni qiymətə satmasıdır. Hətta aşağı həcmdə olan internet paketləri üçün nəzərdə tutulmuş müddət də demək olar ki, eynidir. Obyektivlik xatirinə demək olar ki, Nar internet trafikinin həcmində bir qədər daha humanist mövqedədir. Hər 3 operatoru birləşdirən ən gülməli və acınacaqlı cəhət isə 2020-ci ildə 50-60 MB (?!) internet trafikinin təklif olunmasıdır. Nəzərə alanda ki, hava-su kimi istifadə olunan Whatsapp proqramında səsli mesaj belə bəzən 0,5 MB həcmdə olur, bu şirkətlərin hesablamalarına görə abunəçi 200 səsli mesajı göndərib, daha sonra internetə yenidən 1 AZN xərcləməlidir. Görəsən, bu şirkətlərin başında duran şəxslər bu qədər absurd bir internet həcminin hansı əsaslarla hesablanıb verildiyini necə izah edə bilərlər?
Yekun
Azərbaycanda fəaliyyət göstərən hər 3 operatoru “eyni bezin qırağı” adlandırsaq, yanılmarıq. Əgər eyni bezin qırağı olmasaydılar, qiymətlər, internet trafikinin istifadə müddəti və internet üçün verilmiş həcm bu qədər bir-birinə yaxın olmazdı. 1 dəqiqə hesablanan danışıq intervalını, ödənişli xidmətlərə avtomatik qoşulmaqla baş tutan oğurluğu, müştəri xidmətlərinə olunan zəngin ödənişli olması və s. bu kimi faktları da əlavə etsək, niyə bu qənaətə gəldiyimi açıq-aydın anlamaq olar.